Хар тэнгисийн үр тарианы гэрээг сунгана

Д.Бизьяа

Анд нөхдийн мэдээ

2023-03-15

Украин, Орос хоёр Хар тэнгисийн үр тарианы гэрээг сунгахаар тохиролцсоны дараа сунгах хугацаан дээр санал зөрөлдсөн байна. ОХУ 60 хоног сунгахаар тохиролцсон гэж мэдэгдсэн ч Украин 120 хоног сунгасан хэмээн мэдэгдэж, харин Туркийн тал хэлэлцээр үргэлжилж байна гэжээ. “Reuters” агентлагийн мэдээлснээр, Украины засгийн газрын өндөр албан тушаалтан хэлэхдээ, "Украин гэрээг хатуу сахина" гээд, Хар тэнгисийн үр тарианы хэлэлцээрийг 120 хоногоор сунгана гэжээ. Урд өдөр нь Женевт суугаа ОХУ-ын төлөөлөгч хэлэхдээ, НҮБ-тай хэлэлцээ хийсний үр дүнд "Хар тэнгисийн үр тарианы хэлэлцээрийг цаашид сунгахыг эсэргүүцэхгүй" гэжээ. Туркийн Батлан хамгаалах яам мэдэгдэлдээ "Талуудын хэлэлцээрийг сунгах алхмуудыг өндрөөр үнэлж байна" гээд "хэлэлцээр, зохицуулалт үргэлжилж байна" гэсэн байна. Өнгөрсөн оны 7 дугаар сарын 22-нд Украин, Орос хоёр улс НҮБ болон Туркийн зуучлалаар Хар тэнгисийн үр тарианы хэлэлцээрийг байгуулж, дайны үед ч гэсэн хоёр орны үр тариа, бордоог Хар тэнгисээр дамжуулан аюулгүй тээвэрлэхээр болсон билээ. Одоогийн байдлаар энэ гэрээгээр Украины үр тарианы экспорт 23 сая тоннд хүрсэн бөгөөд харин ОХУ-ын зүгээс дотоодын үр тариа, бордоог экспортлоход учирч буй саад тотгор арилаагүй хэмээн асуудал тавьсаар байгаа ажээ.