ОХУ болон Хятадад хүний эрх ноцтой зөрчигдөж байгааг мэдээлэв

Д.Бизьяа

Анд нөхдийн мэдээ

2023-03-09

     НҮБ-ын Хүний эрхийн дээд комиссар Уокер Турк өнгөрсөн аравдугаар сард албан тушаалаа авснаас хойш анх удаа дэлхийн хүний ​​эрхийн талаарх жилийн тайлангаа танилцуулахдаа Хятад, Оросын хүний ​​эрхийн байдалд санаа зовниж байгаагаа илэрхийлэв. НҮБ-ын Хүний эрхийн зөвлөлийн мэдээлснээр  дээд комиссар Турк "Хятад улсад хүний ​​эрхийн төлөө тэмцэгчид болон өмгөөлөгчдийг дур зоргоороо баривчлах асуудал, мөн Хонконгийн Үндэсний аюулгүй байдлын тухай хуулийн хэрэгжилт нь иргэдийн эрх чөлөөг эрс хязгаарлаж байгаад санаа зовж байна" гэжээ. Тэрбээр мөн өнгөрсөн жил Хятадын Шинжаан дахь уйгур зэрэг үндэстний цөөнхийн эсрэг хүний ​​эрхийг зөрчиж байгаа тухай өгүүлээд, үүний эсрэг авч хэрэгжүүлэх арга хэмжээний талаар тайлбарлав. Үүний дагуу Олон улсын хүний эрхийн байгууллага зөвшөөрөлгүйгээр баривчлагдсан, гэр бүлээс нь тусгаарлагдсан хоригдлуудын асуудлуудыг баримтжуулж, тодорхой дагаж мөрдөх зөвлөмж өгсөн тухай мэдээлсэн байна. Мөн үүнээс гадна Орос улс өнгөрсөн жил Украин руу довтолсны дараа засгийн газрыг шүүмжилсэн хэвлэл мэдээллийн "Новая газета" болон "Москвагийн Хельсинкийн бүлэг" хүний ​​эрхийн байгууллагын байрыг хаасан тухай дурдаж "Энэ бол иргэдийн эрхийнхээ дагуу үйл ажиллагаа явуулах орон зай алга болж байгаагийн шинж" гэжээ. Мөн Оросын армийн нэр төр гутаасан хэргээр 180 гаруй эрүүгийн хэрэг үүсгэсэн бөгөөд үүний үр дүнд сэтгүүлчид, хотын Иргэдийн хурлын гишүүд зэрэг олон хүнд ял оноосон тухай мэдээлжээ. НҮБ-ын Ерөнхий нарийн бичгийн даргын Стратегийн зохицуулалт хариуцсан орлогчоор ажиллаж байсан У.Турк өнгөрсөн оны аравдугаар сараас Хүний эрхийн дээд комиссарын газрыг удирдаж байгаа юм.