АНУ-ын төрийн албан хаагчдыг "TikTok" ашиглахыг хоригложээ

Н.Ариунсайхан

Анд нөхдийн мэдээ

2023-02-28

АНУ-ын Засгийн газраас өөрийн албан хаагчдад 30 хоногийн дотор Хятадын “TikTok” аппликэйшнийг өөрийн хэрэглэдэг ухаалаг төхөөрөмжүүдээсээ устгах даалгавар өгчээ. АНУ-ын мэдээллийн аюулгүй байдлыг хангах санамж бичгийн хүрээнд Холбооны засгийн газрын ажилтнууд гар утас болон бусад ухаалаг төхөөрөмжүүдээс “TikTok”-ийг устгаж, тус компани руу чиглэж буй интернэт урсгалыг хязгаарлах ёстой гэж үзсэн байна. Энэхүү хоригийг өнгөрсөн оны сүүлээр АНУ-ын Конгресс санаачилсан бөгөөд Канад, Европын холбоо, Тайвань болон АНУ-ын мужуудын талаас илүү нь ижил арга хэмжээ авахаа мэдэгдээд байгаа билээ. Харин “TikTok”-ийг хөгжүүлэгч “ByteDance" компанийн зүгээс тус аппликэйшнийг тагнуулын зорилгоор ашигладаг гэсэн нь ташаа мэдээлэл гэж мэдэгдсэн юм. АНУ-ын Засгийн газраас хэрэгжүүлж буй уг хориг нь тус улс дахь хэрэглэгчдийн багахан хувийг хамрах бөгөөд хоригт хамаарахгүй хувийн хэвшлийн компаниуд болон энгийн хэрэглэгчдийн тоо одоогоор 100 сая гаруй байгаа аж.