Сирийн босогчдын мэдэлд байгаа нутагт тусламж хүргэх хоёр суваг нээнэ

Д.Бизьяа

Анд нөхдийн мэдээ

2023-02-15

НҮБ болон Сирийн Засгийн газар хэлэлцээ хийж, газар хөдлөлтөд хамгийн их өртсөн нутгийн нэг болох Сирийн баруун хойд хэсгийн босогчдын хяналтад байгаа бүс нутагт тусламж хүргэх нэмэлт хоёр суваг нээхээр тохиролцжээ. Сирийн ерөнхийлөгч Башар аль-Асад тус нутагт олон улсын тусламжийн барааг Туркээс хүргэхийн тулд гурван сарын хугацаанд хилийн нэмэлт хоёр гарц нээхээр тохиролцсон тухайгаа мэдэгдсэн байна. НҮБ-ын Ерөнхий нарийн бичгийн даргын хүмүүнлэгийн болон яаралтай тусламжийн асуудал эрхэлсэн орлогч Мартин Гриффитс ерөнхийлөгч Асадтай уулзаж тохиролцоонд хүрсэн бөгөөд уг хэлэлцээрийг НҮБ-ын Аюулгүйн зөвлөлд хүргүүлсэн ажээ. Олон орноос хүмүүнлэгийн тусламж авдаг Туркээс ялгаатай нь Сири улс Б.Асадын дэглэмийн үед олон улсын хориг арга хэмжээнд өртөж байгаа тул шууд тусламж авахад хүндрэл учирч байгаа ажээ. Сирийн НҮБ-д суугаа элчин сайд Бассам Саббаг сэтгүүлчдэд хэлэхдээ "Сири улс гурван сарын хугацаанд боломжит бүх сувгаар дамжуулан хүмүүнлэгийн тусламж авна" гэв. “DPA” агентлагийн мэдээлснээр, Сирийн хүний эрхийн ажиглалтын төвийн мэдээлснээр, Курдын автономит бүсээс тусламжийн 75 ачааны машин Сирийн баруун хойд хэсэгт нэвтэрсэн байна.