Украинд сөнөөгч онгоц нийлүүлэхийг дэмжив

Д.Бизьяа

Анд нөхдийн мэдээ

2023-01-31

Мюнхений аюулгүй байдлын бага хурлын тэргүүн Кристоф Хойсген Украинд сөнөөгч онгоц нийлүүлэх асуудлыг дэмжлээ. Тэрбээр 29-нд Германы “ARD Broadcasting Europe” телевизэд өгсөн ярилцлагадаа Оросын түрэмгийллээс хамгаалахад Украинд сөнөөгч онгоц нийлүүлэх нь зүйтэй гэж үзэж байгаагаа хэлээд "Гадаад гүрнүүд олон улсын хууль тогтоомжийн дагуу Украинд зэвсэг нийлүүлэх болно. Үүнд танк, сөнөөгч онгоц хоёулаа багтана" гэсэн байна. К.Хойсген нь Германы канцлер асан Ангела Меркелийн гадаад бодлогын зөвлөх байсан бөгөөд НҮБ-д суугаа Германы байнгын төлөөлөгчөөр ажиллаж байхдаа Хойд Солонгосын хориг арга хэмжээний хорооны даргын үүрэгт ажлыг гүйцэтгэж байжээ. Ирэх сарын 17-19-ний өдрүүдэд Мюнхен хотноо болох Мюнхений аюулгүйн байдлын бага хурал нь 1963 онд байгуулагдсан дэлхийн хамгийн том жил тутмын олон улсын аюулгүй байдлын форум юм. Украины дайнаас хойш анх удаа болох энэ жилийн уулзалтад Германы Ерөнхий сайд Шольц, АНУ-ын дэд ерөнхийлөгч Камала Харрис болон бусад хүчирхэг гүрнүүдийн төрийн тэргүүн, Гадаад хэргийн болон Батлан хамгаалахын сайд нар оролцох ажээ.